Универзитетот „Гоце Делчев“ ги објави конкурсите за упис на студенти на прв, втор и трет циклус студии за академската 2024/2025 година. Првиот уписен рок ќе започне на 20 август, а заинтересираните можат електронски да аплицираат преку порталот на делот за уписи на веб-страницата на УГД. Има близу 4000 слободни места за прв циклус студии.
– Конкурсот опфаќа околу 70 студиски програми на 12 факултети и три уметнички академии. Вкупно има 3983 слободни места. Сите информации за студиските програми се објавени на веб-страницата на УГД во делот за уписите, а заинтересираните во периодот пред нас ќе можат да аплицираат и онлајн, на порталот на веб-страницата, со неколку клика ќе можат да направат свој профил и да ги внесат своите податоци. Но тоа е само првата фаза од аплицирањето, по 5 август ќе треба да се достават и оригиналните документи за да може да се рангираат. Првиот уписен рок е од 20 до 23 август, вториот на 5 и 6 септември, а третиот на 18 и 19 септември. Академската 2024/2025 година ќе започне на 1 октомври – изјави проректорот за настава, проф. д-р Мишко Џидров.
И годинава, Универзитетот има голем број на ослободување од партиципација – на Факултетот за медицински науки од партиципација во првата година ќе бидат ослободени 40-те најдобро рангирани кандидати (20 на Општа медицина и по 10 на Фармација и на Дентална медицина); на Земјоделски факултет, Факултет за туризам и бизнис логистика, Факултет за природни и технички науки и на Правен факултет – 20; Електротехнички факултет, Технолошко-технички факултет, Машински факултет, Факултет за образовни науки и Музичка академија по десет најдобро рангирани; Факултет за информатика – 30 најдобро рангирани редовни студенти во првиот уписен рок и на Ликовна академија и Филмска академија со по пет најдобро рангирани.
Филолошкиот факултет останува со посебна програма за поддршка на новозапишаните студенти, на Македонски јазик и книжевност се ослободуваат од партиципација во сите четири години од студирањето сите кандидати кои ќе се запишат во трите уписни рока. На Германски јазик, Турски јазик и Италијански јазик и книжевност има по десет ослободувања од партиципација, а на Англиски јазик – 20 ослободувања.
Распишани се и конкурсите за втор и трет циклус студии, а има над 1000 слободни места. Вториот циклус се организира по факултети, а во Конкурсот се објавени и студиските програми.
– Третиот циклус студии е организиран по кампуси, има студиски програми во три кампуси, од областите медицински, технички и општествени науки. Фреквенцијата и условите за упис се различни за секоја област и се вклучени во Конкурсот. Пријавувањето за трет циклус студии започнува на 20 август, со тоа што пријавувањето ќе биде електронски, со електронска пријава, кандидатот добива бројче и заедно со таа електронска пријава ги поднесува документите во физичка форма. Овде има еден уписен рок, кој трае од 20 август до 18 октомври, а наставата почнува на 1 ноември (и на втор и на трет циклус). На оние студиски програми каде што нема да се пополнат местата, останува можноста дополнително да се вршат уписи – истакна проф. д-р Зденка Стојановска, проректор за наука на УГД.
