Економскиот факултет на УГД потпиша меморандум за соработка со организацијата „ЦЕФЕ Македонија“. Организацијата работи на промовирање на претприемничкиот дух и подготвување на младите за започнување на сопствен бизнис.

- Овој меморандум е рамка во која се дефинирани сите активности за соработката која се заснова на искористување на научниот потенцијал, истражувачките, просторните капаците на двете страни во насока на унапредување на истражувачките, едукативните и научните проекти. Во овие проекти можат да се вклучат претставници од Универзитетот и од ЦЕФЕ организацијата, изјави деканката на Економскиот факултет, Проф. д-р Оливера Ѓоргиева-Трајковска.

Следниот период ќе биде искористен да се одржат обуки за зголемување на претрпиемничкиот дух кај младите на кои ќе можат да присуствуваат сите заинтересирани.

- Многу е важно дека ние се најдовме на иста фреквенција со професорите од факултетот за тоа што сакаме да го дадеме како вредност на студентите. Тоа е еден искуствен начин на работа, но и една култура на претприемништво. Ние ќе им помогнеме да гледаат можности и тие можности да ги претворат во вредност за општеството, изјави претседателот на ЦЕФЕ Македонија Јован Сталески.

Студентите ќе можат да се информираат за обуките преку веб страниците на Универзитетот и преку своите професори.